Med godt humør og føtene godt planta på jorda er desse to spelmennene trygt forankra i ein tradisjon som bør få meir merksemd i folkemusikk-Noreg. Slåttane og stilen har fleire likskapstrekk med tradisjonane rundt, som Røros og Gudbrandsdalen, men det er likevel noko eiget med Alvdalstradisjonen. Han har ein eigen karakter og historie, og Martin Follstad og Olav Kjernmoen held denne tradisjonen i hevd og formidlar han til generasjonar som kjem. Denne utgjevinga vil glede mangt eit spelmannshjarta. Ho viser ein tradisjon som ikkje har vore så mykje framme i ljoset, formidla av to solide og tradisjonsmedvitne utøvarar med glimt i auga.
