Ingrid Lingaas Fossum har spelt inn si første soloplate, Eit halvt tusenår, på heile tolv gamle langeleikar! Den eldste av dei, Hasvoldseterleiken, er 500 år gamal i år. Vi får høyre ein stor variasjon av ulike klangar og tonalitetar, og kan dykke ned i verda til kvart instrument. Ingrid har i lag med instrumentmakar Oddrun Hegge reist rundt og undersøkt langeleikar frå ulike område i Noreg. Dei har funne fram til tolv eldre instrument, frå Valdres, Telemark, Gudbrandsdalen, Hallingdal og Gjøvik – pluss ein kopi av ein eldre langeleik frå Ulvik. Ingrid har brukt lang tid på å bli kjend med og forstå kvart instrument, og speler ein stor variasjon av låttemateriale frå ulike område. Fokuset har vore å bli kjend med kvar langeleik slik han er – med sine ulydar og utfordringar, men òg med sin unike klang og tonalitet. Der det finst opptak, har ho forsøkt å ta med seg noko av spelestilen til kvar kjelde – utan mål om å kopiere dei heilt.
Det følgjer eit detaljert teksthefte med plata, der ein kan sjå og lesa om kvart instrument ein høyrer, og det Ingrid har funne av informasjon om repertoar og utøvarar knytt til instrumenta. I fysisk form blir plata gjeven ut på vinyl – eit lydformat som kler instrumentet og klangane ekstra godt. På grunn av at det er mindre plass på vinyl, er det nokon fleire kutt på den digitale versjonen.
Sporliste
Side A: 1. SÆTERLÅT og HALLING ETTER AMALIE HASVOLDSETER Langeleik etter Petter Hasvoldseter (1928–2012) 2. DEN STORE GRÅ BUKKEN Langeleik etter Lina Holte (1891–1970) Langeleik etter Anne Milly Teksle (f. 1942) 3. SPEL-SISSEL Langeleik etter Rønnaug Tostensdotter Dalseg (1807–1880) 4. BESSLEIKEN og SKRINDJENTA Langeleik etter Rønnaug Tostensdotter Dalseg (1807–1880) 5. SPRINGAR ETTER ANDERS KJERLAND Langeleik etter Olav H. Hauge (1908–1994) 6. HULDRESLÅTT Langeleik etter Olav H. Hauge (1908–1994) 7. TOLVTALSVISA Langeleik etter Andres Lauvås (1840–1922) Side B: 1. SPRINGAR ETTER GREGAR NORDBØ Langeleik etter Anne Milly Teksle (f. 1942) 2. FUGLEHAUGEN og RANGDI RØLLÅNG Langeleik etter Olav Andreas Hauge (1904–2002) 3. HAN HALLGRIM GJERE ME SKO, HAN Langeleik etter Johannes Halden (1844–1936) 4. THOMASKLUKKELÅTTEN Langeleik etter Gjartrud Bøiesdotter Myhre (1850–1939) 5. KNUD NORDLANDS VALS Langeleik etter Marit Leine (1818–1903) 6. REINLENDER ETTER THORVALD STORELI Langeleik etter Mikkel O. Storeli (1883–1975) 7. SPRINGAR ETTER ANNE WINDINGSTAD Langeleik etter Anne Windingstad (1847–1932) 8. VA DET ‘KJE DU SOM LEIKA MED GURO og FØRNESBRUNEN Langeleik etter Andres Lauvås (1840–1922)
